Lara Goosen is vyftien jaar oud. Hierdie jonglesersindruk is uit eie beweging na LitNet gestuur.
Raaiselsee
Troula Goosen
NB-Uitgewers
ISBN: 9780798181006
Dis Daniel se onverwagse avontuur wat maak dat lesers die boek nie kan neersit nie.
Raaiselsee is ’n historiese verhaal en ’n spookagtige fantasie wat merendeels in die Overstrand afspeel. Die storie gaan oor Daniel, wat grootgemaak word om te steel, en wat vertel word is dat hy, nes sy pa, niks meer as ’n dief is nie. Toe die versoeking om ’n meisie in ’n rolstoel se pêrelhangertjie te gaps te groot geword het, het hy besluit om dit te steel. Daarna voel hy skuldig, maar toe hy besluit om dit terug te gee, beland hy in ’n skip wat hom van Simonstad na Skulpiesbaai wegvoer. Daar ontmoet hy Malgas, ’n visserman, en Grietjie, wat juffrou Caitlin in haar rolstoel moet versorg.
Maar die strand is vol geheime. Wie is die ou vrou wat met haar wolf by die see woon? Waarom het Caitlin so kwaadwillig geword? Is die stories oor die geheimsinnige skeepswrak by Skulpiesbaai waar? Waarom voel dit asof Caitlin se pêrelhangertjie met hom probeer praat?
En hoe hou dit alles met mekaar verband?
Dit is Daniel se missie om die geheim uit te vind en Caitlin se lewe te red.
Raaiselsee het my van die begin af ingetrek en ek kon nie ophou lees nie. Ek is mal oor die storie! Dit het alles wat ’n goeie jeugroman behoort te hê en nog meer: misterie, avontuur, vriendskap en ’n bietjie romanse. Ek beveel die boek definitief vir alle tieners aan.
The post <em>Raaiselsee</em> deur Troula Goosen: ’n jonglesersindruk appeared first on LitNet.